Kai baar jab akeli baithti hun to khud se puchti hun yeh zindagi hai kya????Ek pal mein hi yeh zindagi khushiyan deti aur dusre hi pal gam...Ek pal is ehsaas ki khushi ki koi tumse pyaar karta aur dusre hi pal use khone ka dar aankhon me aansu de deta hai....Ek pal tumhara koi dost tumhare paas hai aur dusre hi pal tumse door chala jaaye........Kya hai yeh zindagi?????
Kisi ke door jaane ke baad kya reh jaata hai...yaadein bas yaadein.....Yaadein un sunhare palon ki jo saath bitaye the, woh khatti meethi yaadein saath hasne ki, saath gaane ki, sukh dukh baantne ki...Kya chahta hai man un palon ko fir jeene ka unhi khushiyon ko saath jeene ka.....par yeh zindagi hai kya yehi to paheli hai!!!!
Yehi sochke lagta hai zindagi hai kya???Khushiyon ki ek meethi nadi ya fir gamon ka namkeen samundar....ya fir is samundar mein hai duvidha naam ka ek bhanwar bhi hai jis mein agar insaan ek baar dhas jaaye to bas us mein aur andar hi jaata rehta hai...Mujhe is zindagi ne kabhi hasaya hai to kabhi rulaya hai..kabhi sochne pe majboor kiya hai ki agar main ro rahi hun to kya yeh aansoo mujhe zindagi ke kuch haseen palon ko jeene se rok rahe hain..Shayad yeh kahin sahi hai to kahin galat hai....Kabhi rone ke baad lagta hai ki andar kitna kuch tha jo is dil ko jala raha tha jo nikal gaya..Kabhi yeh aansoon tumhare ya kisi aur ki aankh se tumhe yeh mehsoos kara dete hain ki dono ek dusre ke kitne kareeb hain..Par dukh bhi hota hai ki tumhare liye kisi ki aankh mein aansoo aa gaye hain...Yeh zindagi kyun aise raaston pe laati hai jahan tum kai humrahi banate ho aur wahi humrahi alag raah pakad lete hain aur raaste badal jaate hain...aur hum fir ek naya saath dhundne lagta hai.
Zindagi mein agar khushi agar kuch pareshani ya dukh ke baad mile to woh ek choti si khushi bhi zindagi bhar ki sabse badi khushi lagti hai..Lagta hai jaise ek jahan hi jeet liya ho,sab kuch apna sa lagne lagta hai,har lamha jeene ko man karta hai,naachne ko man karta hai,apni khushi apne kareebi logon se baantne ko karta hai..Sahi hi kaha jaata hai ki har raat ke baad subah hoti hai aur agar wahi subah amavas ki kaali raat ke baad aaye to suraj ki kirne aur sunhari lagti hain......Khushiyan humari zindagi mein bhar rakhi hain jarurat hai to bas unhe talashne ki, unhe mehsoos karne ki, unhe jeene ki..Agar hum dukh ki paribhasha hi badal dein to shayad dukh kabhi hoga hi nahin..
Zindagi na hi khushi hai na hi gam hai aur na hi duvidha hai..zindagi ek Sangarsh hai ek Chunauti hai..Har pal ko jeena, gam mein muskurana ek chunauti hai,khush hote hue kahin gam mein na doob jaana ek chunauti hai, har duvidha ko suljhana ek chunauti hai..Zindagi humein ishwar ke ek anmol tohfa hai, use kaatna nahi chahiye use jeena chahiye......
Zindagi insaan ko roz naye mod pe le jaati hai..Kabhi zindagi mein sab kuch nahi mil sakta..Waise agar sab kuch mil bhi jaaye to shayad zindagi ke maayne hi badal jayenge......Tabhi to kaha jaata hai..
" Har Kisi Ko Mukkamal Jahan Nahi Milta Kisi Ko Zameen Kisi Ko Aasman Nahi Milta"
Subscribe to:
Post Comments (Atom)
1 comment:
sob se jo important baat hai ke kaam korte jao pholo ka chinta mot koro. eakdin jab tu agee chola jaiega
tob tuje yeh ehsaas hoga ke maine past mein keya achha kiya hai jo toda sa alag hai. oo alag korna hi zindagi hai.ye rona, ansu ye sob kuchi dino ka baat hai job tu kaam korne laag geya phir se wohi kuch alag banane ke liye dekhega ke sob phir se thik ho geya.
-------Kuntal
Post a Comment